ଏହି ବୃହତ୍ ନିବେଶର ସବୁଠାରୁ ବଡ଼ ଲାଭ ରାଜ୍ୟର ଯୁବବର୍ଗଙ୍କୁ ମିଳିବ। ଏହି ପ୍ରକଳ୍ପଗୁଡ଼ିକ ବାସ୍ତବ ରୂପ ନେବା ପରେ ରାଜ୍ୟରେ ହଜାର ହଜାର ଶିକ୍ଷିତ ତଥା କୁଶଳୀ ଯୁବକଯୁବତୀଙ୍କ ପାଇଁ ପ୍ରତ୍ୟକ୍ଷ ଓ ପରୋକ୍ଷ ଭାବେ ନିଯୁକ୍ତିର ସୁଯୋଗ ସୃଷ୍ଟି ହେବ । ଫଳରେ କର୍ମସଂସ୍ଥାନ ପାଇଁ ଯୁବପିଢ଼ିଙ୍କୁ ଆଉ ବାହାର ରାଜ୍ୟ ବା ବିଦେଶକୁ ଯିବାକୁ ପଡ଼ିବ ନାହିଁ ଏବଂ ଦାଦନ ଖଟିବା ସମସ୍ୟାର ମଧ୍ୟ ଅନ୍ତ ଘଟିବ ।

ସରକାରଙ୍କ ଏହି ସଫଳ ୟୁଏଇ ଗସ୍ତ ଓଡ଼ିଶାକୁ ଭାରତର ପୂର୍ବାଞ୍ଚଳ ଗେଟୱେ ଭାବେ ପ୍ରତିଷ୍ଠା କରିବାରେ ଏକ ମାଇଲଖୁଣ୍ଟ ସାବ୍ୟସ୍ତ ହେବ। ଆଗାମୀ ଦିନରେ ଏହିସବୁ ପ୍ରକଳ୍ପର ଶୀଘ୍ର କାର୍ଯ୍ୟାନ୍ୱୟନ ତଥା ସିଙ୍ଗଲ୍ ୱିଣ୍ଡୋ କ୍ଲିୟରାନ୍ସ ମାଧ୍ୟମରେ ତୁରନ୍ତ ଅନୁମୋଦନ ପାଇଁ ସରକାର ଏକ ସ୍ୱତନ୍ତ୍ର କମିଟି ଗଠନ କରି ନିୟମିତ ସମୀକ୍ଷା କରିବେ ବୋଲି ଶିଳ୍ପ ବିଭାଗ ପକ୍ଷରୁ ସ୍ପଷ୍ଟ କରାଯାଇଛି।