ଦଳର ଅଭିଯୋଗ, ଏହି ସଂଶୋଧନ ଆଇନ ଖଣି ଓ ଖଣିଜ ସମ୍ପଦ ଥିବା ଜମି ଉପରେ ରାଜ୍ୟର ଅଧିକାରକୁ ସଙ୍କୁଚିତ କରିଛି । ଏହା ସଂଘୀୟ ବ୍ୟବସ୍ଥା ଉପରେ ଆଘାତ । ଦେଶର ପ୍ରାୟ ୪୪ ପ୍ରତିଶତ ଖଣିଜ ସମ୍ପଦ ଓଡ଼ିଶାରେ ଥିବାରୁ ନୂଆ ବ୍ୟବସ୍ଥାରେ ରାଜ୍ୟ ଅଧିକ କ୍ଷତିଗ୍ରସ୍ତ ହେବ ବୋଲି ବିଜେଡି ଦାବି କରିଛି । MMDR ସଂଶୋଧନ ଆଇନ ପ୍ରତ୍ୟାହାର କରାଯାଉ କିମ୍ବା ଏହାକୁ ସ୍ଥଗିତ ରଖାଯାଉ ବୋଲି ଦଳ ଦାବି କରିଛି । ଏହାସହ ଆଇନ ପ୍ରତ୍ୟାହାର ଦାବିରେ ଓଡ଼ିଶା ବିଧାନସଭାରେ ସର୍ବସମ୍ମତ ପ୍ରସ୍ତାବ ଆଣିବାକୁ ବିଜେଡି ରାଜ୍ୟ ସରକାରଙ୍କୁ କହିଛି ।

ସେପଟେ MMDRକୁ ନେଇ ବିଜେଡି ଆନ୍ଦୋଳନ ପ୍ରସଙ୍ଗରେ କଡ଼ା ସମାଲୋଚନା କରିଛନ୍ତି ରାଜ୍ୟ ବିଜେପି ସଭାପତି ମନମୋହନ ସାମଲ । ସେ କହିଛନ୍ତି ଯେ, ବିଜେଡି ସବୁବେଳେ ବିରୋଧ କରେ, GST ଲାଗୁ ହେବା ସମୟରେ GSTକୁ ବିରୋଧ କରୁଥିଲେ । ୧୫ ହଜାର କୋଟି ଟଙ୍କା ହେଉଛି, ଆମକୁ ଅଧିକ ଟଙ୍କା ପାଇବା ଦରକାର, ୬୧ ହଜାର କୋଟି ଟଙ୍କା ମିଳିଲା ସେମାନେ ଚୁପ୍ ହେଲେ । ଖଣିରେ ୪ ହଜାର କୋଟି ମିଳୁଥିଲା, ୫ ହଜାର କୋଟି ବି ମିଳୁ ନଥିଲା । ୨୦୧୪ ରେ ନରେନ୍ଦ୍ର ମୋଦି ପ୍ରଧାନମନ୍ତ୍ରୀ ହେବା ପରେ ୨୦୧୫ ରେ ପ୍ରଧାନମନ୍ତ୍ରୀ ପଲିସି ଆଣିବା ପରେ ଆମ ରାଜ୍ୟ କ୍ଷତି ସହିବ ବୋଲି ସେମାନେ ଅଭିଯୋଗ କରୁଥିଲେ । ଏବେ ଆମେ ୫୪ ରୁ ୫୬ ହଜାର କୋଟି ପର୍ଯ୍ୟନ୍ତ ପାଉଛନ୍ତି । ସେମାନେ ବିରୋଧ କଣ ପାଇଁ କରୁଛନ୍ତି ବୁଝି ହେଉନି । ଦାୟିତ୍ୱ ସମ୍ପନ୍ନ ବିରୋଧୀ ଦଳ ହୋଇଥିଲେ ଦାୟିତ୍ୱ ସମ୍ପନ୍ନ ବ୍ୟବହାର କରିଥାନ୍ତେ ।