ଭୁବନେଶ୍ୱର: ନୂତନ ଶିକ୍ଷାବର୍ଷର ଆରମ୍ଭରେ ନୂଆ ଶ୍ରେଣୀ ଓ ନୂଆ ବହିକୁ ନେଇ ଛାତ୍ରଛାତ୍ରୀଙ୍କ ମନରେ ଯେଉଁ ଉତ୍ସାହ ଥିଲା, ତାହା ଏବେ ନିରାଶା ତଥା ଉଦ୍ବେଗରେ ପରିଣତ ହୋଇଛି । ସମଗ୍ର ଓଡ଼ିଶାରେ ଛାତ୍ରଛାତ୍ରୀମାନେ ଏବେ ପାଠ୍ୟପୁସ୍ତକ ଅଭାବ, ଶିକ୍ଷକ ମରୁଡ଼ି ଏବଂ ପ୍ରାକୃତିକ ବିପର୍ଯ୍ୟୟ ଭଳି ତ୍ରିମୁଖୀ ସମସ୍ୟାର ସମ୍ମୁଖୀନ ହେଉଛନ୍ତି, ଯାହା ରାଜ୍ୟର ଶିକ୍ଷା ବ୍ୟବସ୍ଥାର ପ୍ରସ୍ତୁତି ଉପରେ ଏକ ବଡ଼ ପ୍ରଶ୍ନବାଚୀ ସୃଷ୍ଟି କରିଛି ।
ବିଦ୍ୟାଳୟ ଖୋଲିବାର ଦୀର୍ଘ ଦିନ ବିତିଯାଇଥିଲେ ସୁଦ୍ଧା ପାଠ୍ୟପୁସ୍ତକ ବଣ୍ଟନ ପ୍ରକ୍ରିୟାରେ ତ୍ରୁଟି ଏବଂ ଅବହେଳା କାରଣରୁ ଅନେକ ପିଲାଙ୍କ ହାତରେ ଏପର୍ଯ୍ୟନ୍ତ ନୂଆ ବହି ପହଞ୍ଚିପାରି ନାହିଁ । ବହି ନଥିବାରୁ କିଛି ସ୍କୁଲରେ ଶିକ୍ଷକମାନେ ପାଠପଢ଼ା ଜାରି ରଖିବା ପାଇଁ ସ୍ମାର୍ଟ ବୋର୍ଡର ସାହାରା ନେଉଛନ୍ତି । ଆଉ ଯେଉଁଠି ସ୍ମାର୍ଟ ବୋର୍ଡ ନାହିଁ, ସେଠାରେ ବାଧ୍ୟ ହୋଇ ମୋବାଇଲ୍ ଫୋନ୍ ମାଧ୍ୟମରେ କ୍ଲାସ୍ ଚାଲିଛି। ଛାତ୍ରଛାତ୍ରୀଙ୍କ ପାଇଁ ପାଠ୍ୟପୁସ୍ତକ ଶିକ୍ଷାଗ୍ରହଣର ସବୁଠାରୁ ମୌଳିକ ତଥା ଗୁରୁତ୍ୱପୂର୍ଣ୍ଣ ମାଧ୍ୟମ ହୋଇଥିବା ବେଳେ ବହି ନପାଇ ସେମାନେ କିପରି ନିଜର ସିଲାବସ୍ ଶେଷ କରିବେ, ତାହାକୁ ନେଇ ସବୁଠି ଚିନ୍ତା ପ୍ରକଟ କରାଯାଇଛି ।
ଅନ୍ୟପକ୍ଷରେ, ଲଗାଣ ବର୍ଷା ଓ ବନ୍ୟା କାରଣରୁ ରାଜ୍ୟର ଅନେକ ଅଞ୍ଚଳରେ ପାଠପଢ଼ା ବ୍ୟାପକ ଭାବେ ବାଧାପ୍ରାପ୍ତ ହୋଇଛି। ବହୁ ଗାଁ ଏବେ ବି ବନ୍ୟା ପାଣି ଘେରରେ ରହିଥିବାରୁ ପ୍ରଭାବିତ ସ୍କୁଲଗୁଡ଼ିକରେ ସ୍ୱାଭାବିକ କ୍ଲାସ୍ କରିବା ଅସମ୍ଭବ ହୋଇପଡ଼ିଛି। ଯେଉଁ କିଛି ସ୍ଥାନରେ ବର୍ଷା ଛାଡିବା ପରେ ସ୍କୁଲ ଖୋଲା ଅଛି ଏବଂ ପିଲାମାନେ ଆଗ୍ରହର ସହ ଉପସ୍ଥିତ ରହୁଛନ୍ତି, ସେଠାରେ ଶିକ୍ଷକ ଅଭାବ ଏକ ନୂଆ ବିରାଟ ପ୍ରତିବନ୍ଧକ ସାଜିଛି । ରିପୋର୍ଟ ଅନୁଯାୟୀ, ଗଣିତ, ଇଂରାଜୀ, ହିନ୍ଦୀ ଏବଂ ସଂସ୍କୃତ ଭଳି ଗୁରୁତ୍ୱପୂର୍ଣ୍ଣ ବିଷୟ ପଢ଼ାଇବା ପାଇଁ ଅନେକ ସ୍କୁଲରେ ବିଷୟଭିତ୍ତିକ ଶିକ୍ଷକ ଆଦୌ ନାହାନ୍ତି। ଫଳରେ ଏହି ସବୁ ବିଷୟଗୁଡ଼ିକରେ ପିଲାମାନେ ନିୟମିତ ଶିକ୍ଷାଲାଭରୁ ବଞ୍ଚିତ ହେଉଛନ୍ତି । ବର୍ତ୍ତମାନ ଷାଣ୍ମାସିକ ପରୀକ୍ଷା ପାଖେଇ ଆସୁଥିବା ବେଳେ ଠିକ୍ ସମୟରେ କୋର୍ସ କିପରି ସରିବ ଏବଂ ପିଲାମାନେ ପରୀକ୍ଷା ପାଇଁ କିପରି ପ୍ରସ୍ତୁତ ହେବେ, ସେନେଇ ଆଶଙ୍କା ଘନୀଭୂତ ହେଉଛି।
